Events

WinterFest 2013Ձմեռային Փառատոն Հայաստանը ս.թ. դեկտեմբերի 21-ին բոլորին հրավիրում է Խնկո-Ապոր անվան ազգային գրադարան՝ մասնակցելու Ամանորի բացօթյա և փակօթյա զանազան միջոցառումների:

Հյուրերին կդիմավորի Կաղանդ Պապը և նրա օգնական Արեգը, ում հետ փառատոնի հյուրերը կարող են զրուցել, իմանալ խորհուրդ կծիկների մասին և լուսանկարվել: Գրադարանի ներսում երեխաներն ու բոլոր ցանկացողները կարող են մասնակցել հեքիաթասացության՝ կընթերցվի «Կաղանդ պապ. վերադարձ Ռիգելից» պատումը:

Բնապահպանությունը ևս Ձմեռային Փառատոնի կարևոր բաղադրիչն է: Ցուցահանդես-մրցույթին կներկայացնեն վերամշակված նյութերից պատրաստված բնապահպանական տոնածառեր,  կանցկացնվի բնապահպանական կրթության դասընթաց, որի ընթացքում մասնակիցները կսովորեն՝ ինչպես վերամշակել թուղթը և այլ նյութեր: Երեխաները կարող են նաև իրենց տոնածառը զարդարելու համար խաղալիքներ պատրաստել:

Միջոցառումները կուղեկցվեն ամանորյա երգչախմբի երգերով՝ ստեղծելով տոնական տրամադրություն և փոխանցելով այն յուրաքանչյուր մասնակցի և անցորդի: Ամանորի երգչախումը քաղաքում կշրջի նաև ուրբաթ երեկոյան՝ տոնական կատարումներով ու գունավոր լուսավառությամբ ջերմացնելով բնակիչների և հյուրերի ձմեռային երեկոն:

Ձմեռային Փառատոնի հիմնական միջոցառումները տեղի կունենան դեկտեմբերի 21-ին, սակայն փառատոնը մեկնարկել է դեկտեմբերի 16-ից՝ վիրտուալ փառատոնով, որը կտևի մինչև դեկտեմբերի 21-ը: Վիրտուալ փառատոնը տեղի  է ունենում Ձմեռային Փառատոն Հայաստանի www.facebook.com/winterfestarmenia էջում. այն հետաքրքրաշարժ վիկտորինա է՝ Ամանորի և Սուրբ Ծննդյան մասին հարցերով: Հաղթողին նվեր է սպասվում Կաղանդ Պապի կողմից:

Ձմեռային Փառատոնի բոլոր միջոցառումների մուտքն ազատ է:

Միասին գունավորենք ձմեռը: